2Th 2 | KhmKCB | STEP | បងប្អូន អើយ ! ចំពោះ ការ យាងមក របស់ព្រះ យេស៊ូ គ្រិស្ដ ជា ព្រះអម្ចាស់ របស់ យើង និង ការ ដែល យើង ត្រូវជួបជុំ គ្នា នៅចំពោះ មុខ របស់ ព្រះអង្គ នោះយើង អង្វរ អ្នករាល់គ្នា ថា

2 Thessalonians 2

1 បងប្អូនអើយ! ចំពោះការយាងមករបស់ព្រះយេស៊ូគ្រិស្ដជាព្រះអម្ចាស់របស់យើងនិងការដែលយើងត្រូវជួបជុំគ្នានៅចំពោះមុខរបស់ព្រះអង្គនោះយើងអង្វរអ្នករាល់គ្នាថា 2 កុំប្រញាប់ជ្រួលច្របល់ឬស្លន់ស្លោឡើយទោះបីដោយសារវិញ្ញាណណាពាក្យសំដីណាឬសំបុត្រណាដែលទំនងជាមកពីយើងក្ដីដែលថាថ្ងៃរបស់ព្រះអម្ចាស់បានមកដល់ហើយ។ 3 កុំឲ្យអ្នកណាម្នាក់បញ្ឆោតអ្នករាល់គ្នាបានដោយរបៀបណាមួយឡើយដ្បិតថ្ងៃនោះនឹងមិនមកដល់ឡើយលុះត្រាតែការបះបោរនិងអាប្រឆាំងច្បាប់គឺកូននៃសេចក្ដីវិនាសលេចមកជាមុនសិន 4 វាគឺជាអ្នកប្រឆាំងហើយលើកតម្កើងខ្លួនខ្ពស់ជាងអ្វីៗដែលគេហៅថាព្រះឬអ្វីៗដែលគេថ្វាយបង្គំផងដូច្នេះហើយបានជាវាអង្គុយក្នុងព្រះវិហាររបស់ព្រះជាម្ចាស់ហើយតាំងខ្លួនជាព្រះទៀតផង។ 5 តើអ្នករាល់គ្នាមិនចាំថាកាលខ្ញុំនៅជាមួយអ្នករាល់គ្នាខ្ញុំបានប្រាប់អ្នករាល់គ្នាអំពីសេចក្ដីទាំងនេះហើយទេឬ? 6 ហើយឥឡូវនេះអ្នករាល់គ្នាស្គាល់អ្វីដែលឃាត់វាហើយដើម្បីឲ្យវាលេចមកតាមពេលកំណត់របស់វា។ 7 ដ្បិតអាថ៌កំបាំងរបស់ការប្រឆាំងច្បាប់កំពុងធ្វើសកម្មភាពស្រាប់ហើយគ្រាន់តែឥឡូវនេះមានអ្នកកំពុងឃាត់វាលុះត្រាតែអ្នកនោះត្រូវដកចេញ 8 ទើបអាប្រឆាំងច្បាប់នោះលេចមកហើយព្រះអម្ចាស់យេស៊ូនឹងសម្លាប់វាដោយខ្យល់ពីព្រះឱស្ឋរបស់ព្រះអង្គទាំងធ្វើឲ្យវាវិនាសដោយរស្មីនៃការយាងមករបស់ព្រះអង្គ 9 អាប្រឆាំងច្បាប់នោះនឹងមកដោយសារអំណាចរបស់អារក្សសាតាំងទាំងមានឫទ្ធិទីសំគាល់និងការអស្ចារ្យក្លែងក្លាយគ្រប់បែបយ៉ាង 10 ព្រមទាំងការឆបោកដ៏ទុច្ចរិតគ្រប់យ៉ាងចំពោះអស់អ្នកដែលត្រូវវិនាសព្រោះពួកគេមិនព្រមស្រលាញ់សេចក្ដីពិតដើម្បីឲ្យបានសង្គ្រោះឡើយ។ 11 ហេតុនេះហើយបានជាព្រះជាម្ចាស់ចាត់ឲ្យសេចក្ដីបោកប្រាស់ដ៏មានអំណាចមកដើម្បីឲ្យពួកគេជឿលើសេចក្ដីភូតភរ 12 និងដើម្បីឲ្យអស់អ្នកដែលមិនជឿលើសេចក្ដីពិតប៉ុន្តែពេញចិត្តនឹងសេចក្ដីទុច្ចរិតត្រូវទទួលទោស។ 13 ឱបងប្អូនដែលព្រះអម្ចាស់ស្រលាញ់អើយ! យើងត្រូវអរព្រះគុណព្រះជាម្ចាស់សម្រាប់អ្នករាល់គ្នាជានិច្ចព្រោះព្រះជាម្ចាស់បានជ្រើសរើសអ្នករាល់គ្នាទុកជាផលដំបូងសម្រាប់សេចក្ដីសង្គ្រោះដោយសារព្រះវិញ្ញាណញែកអ្នករាល់គ្នាជាបរិសុទ្ធហើយដោយសារអ្នករាល់គ្នាមានជំនឿលើសេចក្ដីពិត។ 14 ព្រះអង្គបានត្រាស់ហៅអ្នករាល់គ្នាសម្រាប់សេចក្ដីសង្គ្រោះនេះតាមរយៈដំណឹងល្អរបស់យើងដើម្បីឲ្យអ្នករាល់គ្នាទទួលបានសិរីរុងរឿងរបស់ព្រះយេស៊ូគ្រិស្តជាព្រះអម្ចាស់របស់យើង។ 15 ដូច្នេះបងប្អូនអើយ! ចូរឈរឲ្យមាំមួនហើយកាន់តាមសេចក្ដីដែលយើងបានបង្រៀនអ្នករាល់គ្នាចុះទោះបីដោយពាក្យសំដីឬសំបុត្រក្ដី។ 16 សូមឲ្យព្រះយេស៊ូគ្រិស្ដជាព្រះអម្ចាស់របស់យើងនិងព្រះជាម្ចាស់ជាព្រះវរបិតាដែលព្រះអង្គស្រលាញ់យើងព្រមទាំងប្រទានសេចក្ដីកម្សាន្ដចិត្ដដ៏អស់កល្បជានិច្ចនិងសេចក្ដីសង្ឃឹមដ៏ប្រសើរតាមរយៈព្រះគុណ 17 លើកទឹកចិត្តអ្នករាល់គ្នាហើយពង្រឹងអ្នករាល់គ្នាឲ្យមាំមួនឡើងក្នុងគ្រប់កិច្ចការល្អនិងពាក្យសំដីផង។